ໃນວັນທີ 31 ມັງກອນ 2025, ກົມຄຸ້ມຄອງຊັບສິນແຫ່ງລັດ ກະຊວງການເງິນ ໄດ້ຈັດພິທີ ປິດຊຸດຝຶກອົບຮົມວຽກງານວິຊາສະເພາະ, ວຽກງານກວດກາຊັບສິນຂອງລັດ ໃຫ້ພະນັກງານຂະແໜງຊັບສິນ ທົ່ວປະເທດ ປະຈໍາປີ 2024 ໂດຍການເປັນປະທານຂອງ ທ່ານ ວົງພະສິດ ສີລາວົງ ຮອງຫົວໜ້າກົມຄຸ້ມຄອງຊັບສິນແຫ່ງລັດ, ມີວິທະຍາກອນ ແລະ ນັກສໍາມະນາກອນ ຂະແໜງຊັບສິນ ໃນຂອບເຂດທົ່ວປະເທດ ເຂົ້າຮ່ວມ.
 |  |
ໃນພິທີ, ທ່ານ ນາງ ສົມສະຫວັນ ຫຼວງພະໄຊ ຫົວໜ້າພະແນກຄຸ້ມຄອງຊັບສິນແຫ່ງລັດ ກົມຄຸ້ມຄອງຊັບສິນແຫ່ງລັດ ໄດ້ລາຍງານຜົນສໍາເລັດຊຸດຝຶກອົບຮົມຄັ້ງນີ້ ເຊິ່ງໄດ້ດຳເນີນມາເປັນເວລາ 05 ວັນລັດຖະການ ແຕ່ວັນທີ 27-31 ມັງກອນ 2025, ເທົ່າກັບ 40 ຊົ່ວໂມງ; ໂດຍມີນັກສໍາມະນາກອນເຂົ້າຮ່ວມທັງໝົດ 90 ທ່ານ, ຍິງ 12 ທ່ານ ທີ່ມາຈາກນະຄອນຫຼວງ ແລະ ບັນດາແຂວງ ໃນຂອບເຂດທົ່ວປະເທດ ເຊິ່ງໄດ້ຝຶກກ່ຽວກັບວຽກງານນໍາໃຊ້ບັດກວດກາຂອງເຈົ້າໜ້າທີ່ນະແໜງຄຸ້ມຄອງຊັບສິນແຫ່ງລັດ; ວຽກງານກວດກາພັກ; ວຽກງານກວດກາລັດ ແລະ ວຽກງານຕ້ານການສໍ້ລາດບັງຫຼວງ; ວຽກງານແກ້ໄຂຜົນການກວດສອບ-ກວດກາ; ວຽກງານກວດກາຊັບສິນຂອງລັດທີ່ຕິດພັນກັບວຽກງານບັນດາພະແນກອ້ອມຂ້າງກົມ.
 |  |
 |  |
ພາຍຫຼັງສໍາເລັດການຝຶກອົບຮົມ ເຫັນໄດ້ວ່ານັກສຳມະນາກອນແຕ່ລະທ່ານໄດ້ມີຄວາມຮັບຮູ້ໃໝ່ເພີ່ມຂຶ້ນ, ສາມາດນໍາໃຊ້ບົດຮຽນ ເພື່ອມາໝູນໃຊ້ເຂົ້າໃນການປະຕິບັດວຽກງານວິຊາສະເພາະ, ການກວດກາຊັບສິນຂອງລັດ ເພື່ອໃຫ້ຕອບສະໜອງໄດ້ການປ່ຽນແປງຂອງຟື້ນຖານເສດຖະກິດ ແລະ ການຄຸ້ມຄອງງົບປະມານໃນແຕ່ລະໄລຍະ. ເຊິ່ງຜ່ານການປະເມີນຜົນຂອງການຝຶກອົບຮົມໃນຄັ້ງນີ້ ແມ່ນຢູ່ໃນລະດັບດີ ຫາ ດີຫຼາຍ ສະເລ່ຍ 90% ໃນຄວາມຮັບຮູ້, ຮຽນຮູ້ດ້ານເນື້ອ ແລະ ຂອດການຈັດຕັ້ງປະຕິບັດວຽກງານຕົວຈິງ.
ໃນພິທີ ຍັງໄດ້ມອບໃບຢັ້ງຢືນສໍາເລັດການຝຶກອົບຮົມ ໃຫ້ແກ່ນັກສໍາມະນາກອນ ເຊິ່ງໃຫ້ກຽດມອບໂດຍ ທ່ານ ວົງພະສິດ ສີລາວົງ ຮອງຫົວໜ້າກົມຄຸ້ມຄອງຊັບສິນແຫ່ງລັດ.
