ໃນວັນທີ 01 ເມສາ 2025, ກົມພາສີ ໄດ້ຈັດຊຸດຝຶກອົບຮົມ ຫຼັກສູດ “ຜູ້ແຈ້ງພາສີທົ່ວໄປ” ຊຸດທີ I ຂອງປີ 2025 ໃຫ້ແກ່ວິສາຫະກິດໃນທົ່ວປະເທດ ທີ່ດໍາເນີນທຸລະກິດ ແຈ້ງພາສີສິນຄ້າ, ເຄື່ອງຂອງ ຂອງຕົນເອງ ທີ່ມີຈຸດປະສົງສົ່ງອອກ-ນໍາເຂົ້າສິນຄ້າ, ເຄື່ອງຂອງ ໂດຍການເປັນປະທານ ຂອງ ທ່ານ ພຸດທະນິກອນ ເຄນນະວົງ ຮອງຫົວໜ້າກົມພາສີ, ຕາງໜ້າຈາກບັນດາວິສາຫະກິດ ພ້ອມດ້ວຍພະແນກການກ່ຽວຂ້ອງຂອງກົມພາສີເຂົ້າຮ່ວມ. ໂອກາດນີ້ ທ່ານ ພຸດທະນິກອນ ເຄນນະວົງ ກໍ່ໄດ້ມີຄຳເຫັນຕໍ່ຊຸດຝຶກອົບຮົມຄັ້ງນີ້ວ່າ: ວຽກງານການແຈ້ງພາສີ ແມ່ນມີຄວາມສຳຄັນຫຼາຍ ເພາະບັນດາທ່ານ ຈະມີບົດບາດເປັນຜູ້ແຈ້ງພາສີສິນຄ້າ, ເຄື່ອງຂອງ ຊຶ່ງຕ້ອງມີຄວາມຮັບຜິດຊອບຕໍ່ໜ້າກົດໝາຍ ແລະ ລະບຽບກຳນົດ. ສະນັ້ນ, ຈຶ່ງມີຄວາມຈຳເປັນທີ່ຕ້ອງໄດ້ມີການຝຶກອົບຮົມຢ່າງຖືກຕ້ອງ ແລະ ຄົບຖ້ວນຕາມມາດຕະຖານ ແລະ ເງື່ອນໄຂ ທີ່ກຳນົດໄວ້ໃນ ຄໍາແນະນໍາ ຂອງກະຊວງການເງິນ ສະບັບເລກທີ 5916/ກງ, ລົງວັນທີ 25 ພະຈິກ 2021. ໃຫ້ບັນດານັກສໍາມະນາກອນ ເປັນເຈົ້າການເອົາໃຈໃສ່ແລກປ່ຽນບົດຮຽນຢ່າງຕັ້ງໜ້າ ກັບນັກວິທະຍາກອນຜູ້ມີປະສົບການ, ມີຄວາມຊໍານານງານດ້ານວຽກງານດັ່ງກ່າວ ເພື່ອນໍາໃຊ້ຄວາມຮູ້ທີ່ໄດ້ຮັບການຖ່າຍທອດຈາກວິທະຍາກອນ ເພື່ອໝູນໃຊ້ການປະຕິບັດໜ້າວຽກຕົວຈິງ ໃຫ້ສອດຄ່ອງກັບກົດໝາຍ ແລະ ລະບຽບການກຳນົດ. ໃນການຝຶກອົບຮົມໃນຄັ້ງນີ້ ແມ່ນດຳເນີນເປັນເວລາ 04 ວັນ, ນັກສໍາມະນາກອນຈະໄດ້ຮຽນຮູ້ ກ່ຽວກັບ: ຄວາມຮູ້ພຶ້ນຖານກົົດໝາຍວ່າດ້ວຍພາສີ; ຄວາມຮູ້ພື້ນຖານກົດໝາຍວ່າດ້ວຍສ່ວຍສາອາກອນ; ຄໍາແນະນໍາຂອງກະຊວງການເງິນ ສະບັບເລກທີ 5916/ກງ; ການຈັດລະຫັດສິນຄ້າ ແລະ ສາລະບານອັດຕາພາສີ; ການຢັ້ງຢືນແຫຼ່ງກຳເນີດສິນຄ້າ ແລະ ການປະຕິບັດສັນຍາການຄ້າເສລີ; ການກໍານົດມູນຄ່າແຈ້ງ; ການປະກອບຂໍ້ມູນລົງໃນໃບແຈ້ງພາສີ; ແລະ ການນໍາໃຊ້ລະບົບເອຊີກຸດາ ແລະ ການແຈ້ງພາສີຜ່ານລະບົບ NSWA+. ພ້ອມນັ້ນ ຍັງໃຫ້ຮູ້ຕື່ມອີກວ່າ: ການຝຶກອົບຮົມລັກສະນະນີ້ ແມ່ນຈະໄດ້ສືບຕໍ່ ຈັດຝຶກອົບຮົມໃຫ້ບັນດາແຂວງ ເພື່ອໃຫ້ມີຄວາມເອກະພາບກັນໃນຂອບເຂດທົ່ວປະເທດຕື່ມອີກດ້ວຍ.
