ໃນວັນທີ 02 ເມສາ 2025, ໄດ້ເປີດກອງປະຊຸມວຽກງານ 3 ສ້າງ ທີ່ ກະຊວງການເງິນ ໂດຍການເປັນປະທານ ຂອງ ທ່ານ ພູວົງ ກິດຕະວົງ ຮອງລັດຖະມົນຕີກະຊວງການເງິນ ມີຫົວໜ້າກົມປົກຄອງທ້ອງຖີ່ນ ກະຊວງພາຍໃນ, ບັນດາກົມອ້ອມຂ້າງກະຊວງການເງິນ ແລະ ແຂກຖືກເຊີນເຂົ້າຮ່ວມ. ຈຸດປະສົງກອງປະຊຸມຄັ້ງນີ້ແມ່ນເພື່ອ: ເຜີຍແຜ່ນິຕິກຳ ແນະນໍາກ່ຽວກັບການສ້າງແຜນວຽກ, ແຜນງານ, ການກຳນົດຕົວຊີ້ວັດ, ການສະຫຼຸບລາຍງານວຽກງານ ເຮັດໃຫ້ສາມາດນໍາໃຊ້ໃນການຈັດຕັ້ງປະຕິບັດຕົວຈິງ; ພ້ອມກັນປຶກສາຫາລື ແລກປ່ຽນຄໍາຄິດຄໍາເຫັນ ຕໍ່ວຽກງານ 3 ສ້າງ ແລະ ໃຫ້ບັນດາກົມ, ການສົ່ງແຜນການເຄື່ອນໄຫວ, ແຜນວຽກ, ແຜນງານ ການກຳນົດຕົວຊີ້ວັດວຽກງານ ດັ່ງກ່າວໃຫ້ຫ້ອງການ ເພື່ອສັງລວມລາຍງານ ໃຫ້ຄະນະນໍາກະຊວງ. ວຽກງານ 3 ສ້າງ ຂອງກະຊວງການເງິນ ແມ່ນມີຄວາມສໍາຄັນ ສະນັ້ນ ຈື່ງຈັດຕັ້ງປະຕິບັດວຽກງານດັ່ງກ່າວ ໂດຍໄດ້ເຊີນກະຊວງພາຍໃນ ມານໍາສະເໜີກ່ຽວກັບບັນດານິຕິກຳ ແລະ ກົນໄກການຈັດຕັ້ງປະຕິບັດວຽກງານ 3 ສ້າງຂອງກະຊວງການເງິນ ຕາມຕົວຊີ້ວັດຂອງກະຊວງການເງິນ ແລະ ຕາມການເຫັນດີເປັນເອກະພາບຂອງກອງປະຊຸມຄັ້ງວັນທີ 5 ກຸມພາ 2025. ໂອກາດດັ່ງກ່າວ, ທ່ານ ພູວົງ ກິດຕະວົງ ຮອງລັດຖະມົນຕີ ກະຊວງການເງິນ ໄດ້ມີທິດຊີ້ນຳ ໃນກອງປະຊຸມ ຄັ້ງນີ້: ໂດຍປະຕິບັດຕາມທິດຊີ້ນໍາຂອງຄະນະນໍາກະຊວງການເງິນ ແລະ ຕາມທິດສ້າງເສດຖະກິດ ເອກະລາດເປັນເຈົ້າຕົນເອງ ກະຊວງການເງິນ ຈໍາເປັນຕ້ອງສ້າງຄວາມເຂັ້ມແຂງໃຫ້ແກ່ວຽກງານ 3 ສ້າງໃຫ້ເຂົ້າສູ່ລວງເລິກຕົວຈິງ. ໃນກອງປະຊຸມຄັ້ງນີ້ ໃຫ້ບັນດາກົມ ສຸມໃສສົນທະນາ ແລະ ແລກປ່ຽນບົດຮຽນ ແບບລັກສະນະວິຊາການກ່ຽວກັບວຽກງານຕົວຈິງຂອງວຽກງານ 3 ສ້າງ ແນໃສ່ເຮັດໃຫ້ຂອດການຈັດຕັ້ງປະຕິບັດຕົວຈິງຂອງວຽກງານ 3 ສ້າງຢ່າງຄ່ອງຕົວ, ມີປະສິທິພາບ ແລະ ບັນລຸຕາມລຳດັບຄາດໝາຍ.
