ໃນວັນທີ 31 ມັງກອນ 2025, ຢູ່ທີ່ສະຖາບັນການເງິນ-ການບັນຊີ ໄດ້ຈັດພິທີມອບໃບຢັ້ງຢືນ ສໍາເລັດການຝຶກອົບຮົມ ໄລະຍະສັ້ນ ສໍາລັບລັດຖະກອນໃໝ່ ຂອງກະຊວງການເງິນ ປີ 2023 ແລະ ປີ 2024 ໂດຍການໃຫ້ກຽດເປັນປະທານ ແລະ ມອບໃບຢັ້ງຢືນ ຂອງທ່ານ ພູວົງ ກິດຕະວົງ ຮອງລັດຖະມົນຕີ ກະຊວງການເງິນ, ມີທ່ານ ຟອງສີສຸພັນ ພົມມະວົງ ຫົວໜ້າສະຖາບັນການເງິນ-ການບັນຊີ ພ້ອມດ້ວຍຄະນະຮັບຜິດຊອບ ແລະ ລັດຖະກອນໃໝ່ ຂະແໜງການເງິນ ເຂົ້າຮ່ວມ.
 |  |
ໃນພິທີ, ທ່ານ ຟອງສີສຸພັນ ພົມມະວົງ ລາຍງານຜົນສໍາເລັດຂອງການຝຶກອົບຮົມຄັ້ງນີ້ ເຊິ່ງນັກສຳມະນາກອນທັງໝົດມີ 28ທ່ານ, ຍິງ 11 ທ່ານ. ໃນນີ້, ໃຊ້ເວລາຮຽນທັງໝົດ 20 ວັນ ລັດຖະການ ແຕ່ວັນທີ 06 ຫາ 31 ມັງກອນ 2025 ເທົ່າກັບ 160 ຊົ່ວໂມງ ໂດຍໄດ້ຝຶກໃນ 03 ພາກ ຄື: ພາກຄວາມຮູ້ທົ່ວໄປ; ຄວາມຮູ້ພື້ນຖານວິຊາສະເພາະ (ພຶດຕິກໍາຕົວຈິງ) ແລະ ພາກຄວາມຮູ້ວິຊາສະເພາະ (ນິຕິກໍາຂະແໜງການເງິນ).
 |  |
 |  |
ຜ່ານການຕິດຕາມ, ກວດກາ ເຫັນໄດ້ວ່ານັກສໍາມະນາກອນມີຄວາມຕັດສິນໃຈສູງ, ເອົາໃຈໃສ່ເຂົ້າຮ່ວມຝຶກອົບຮົມເປັນປົກກະຕິ, ມີຄວາມເຂົ້າໃຈຕໍ່ທິດສະດີຕ່າງໆສົມທຽບກັບການປະຕິບັດໜ້າທີ່ວຽກງານຕົວຈິງ, ປະຕິບັດໂມງເວລາຢ່າງເຄັ່ງຄັດ, ເອົາໃຈໃສ່ຄົ້ນຄວ້າປະກອບຄຳເຫັນ ພ້ອມທັງຍົກບັນຫາເພື່ອແລກປ່ຽນປະສົບການໃນການປະຕິບັດໜ້າທີ່ວິຊາສະເພາະ ລະຫວ່າງ ນັກສຳມະນາກອນກັບວິທະຍາກອນ ແລະ ລະຫວ່າງ ນັກສຳມະນາກອນດ້ວຍກັນ ພ້ອມທັງຂຽນບົດລາຍງານ (ບົດເກັບກ່ຽວ) ເພື່ອເປັນການທົບທວນບົດຮຽນທີ່ໄດ້ຮັບຈາກການຝຶກອົບຮົມຄັ້ງນີ້. ເຊິ່ງຜ່ານການປະເມີນຜົນ ເຫັນໄດ້ວ່ານັກສໍາມະນາກອນ ມີຄວາມໃຈເຂົ້າໃຈຕໍ່ຫົວຂໍ້ທີ່ນໍາມາຝຶກອົບຮົມເພີ່ມຂຶ້ນຫຼາຍ, ເຂົ້າໃຈທິດສະດີ ແລະ ສົມທຽບກັບການປະຕິບັດໜ້າທີ່ວຽກງານຕົວຈິງ ລະດັບດີຫຼາຍ ເທົ່າກັບ 92.60%; ລະດັບດີ ເທົ່າກັບ 7.40%.
ໂອກາດນີ້, ທ່ານ ພູວົງ ກິດຕະວົງ ໄດ້ສະແດງຄວາມຊົມເຊີຍຕໍ່ຜົນສໍາເລັດຂອງຊຸດຝຶກອົບຮົມຄັ້ງນີ້ ແລະ ຍັງໃຫ້ຮູ້ວ່າ: ການຝຶກອົບຮົມ ແນ່ໃສ່ສ້າງພື້ນຖານໃຫ້ແກ່ ພະນັກງານລັດຖະກອນໃໝ່ ກະຊວງການເງິນ ເພື່ອຮັບປະກັນການປະຕິບັດໜ້າທີ່ຂອງພະນັກງານຂະແໜງການເງິນໃນຕໍ່ໜ້າ ຕ້ອງມີຄວາມຮູ້ຄວາມສາມາດຢ່າງພຽງພໍ ພ້ອມກັນນັ້ນ ຍັງເປັນການຜັນຂະຫຍາຍສ້າງພະນັກງານວິຊາການໃຫ້ມີແນວຄວາມຄິດອັນໃໝ່ ສ້າງໃຫ້ເປັນຜູ້ສຶບທອດໃນອະນາຄົດ ແລະ ເຊື່ອໝັ້ນວ່າ ບັນດາລັດຖະກອນໃໝ່ ທີ່ໄດ້ຮັບການຝຶກຄັ້ງນີ້ ຈະສາມາດນໍາເອົາບົດຮຽນດັ່ງກ່າວໄປຜັນຂະຫຍາຍ ແລະ ໝູນໃຊ້ເຂົ້າໃນວຽກງານຂະແໜງການເງິນໄດ້ໃນຕໍ່ໜ້າ.
