ສະຫຼຸບການຈັດຕັ້ງປະຕິບັດວຽກງານຄັງເງິນແຫ່ງຊາດ ທົ່ວປະເທດປະຈໍາປີ 2024 ແລະ ທິດທາງແຜນການ ປີ 2025

          ໃນລະຫວ່າງວັນທີ 20 ຫາ 21 ມັງກອນ 2025 ໄດ້ມີການດຳເນີນກອງປະຊຸມສະຫຼຸບການ ຈັດຕັ້ງປະຕິບັດວຽກງານຄັງເງິນແຫ່ງຊາດ ປະຈໍາປີ 2024 ແລະ ທິດທາງແຜນການ ປີ 2025 ໂດຍການເປັນປະທານ ຂອງທ່ານ ພູວົງ  ກິດຕະວົງ ຮອງລັດຖະມົນຕີກະຊວງການເງິນ, ມີຕາງໜ້າຈາກບັນດາກົມທີ່ກ່ຽວຂ້ອງ, ທະນາຄານແຫ່ງ ສປປລາວ, ຜູ້ຕາງໜ້າຄັງເງິນແຫ່ງຊາດ ປະຈຳ ແຂວງຈາກທົ່ວປະເທດ ເຂົ້າຮ່ວມ.

          ໂອກາດນີ້, ທ່ານ ພູວົງ ກິດຕະວົງ ໄດ້ມີຄຳເຫັນຕໍ່ກອງປະຊຸມບາງຕອນສຳຄັນວ່າ: ກອງປະຊຸມ ຄັ້ງນີ້ສຸດທີ່ມີຄວາມໝາຍສຳຄັນ ເຊີ່ງເປີດຂື້ນໃນທາມກາງໄລຍະທີ່ ຂຸ້ນຂ້ຽວ ສຸມໃສ່ໃນການສະຫຼຸບ ສູນໂມງ-ຕົວເລກຂາດຕົວງົບປະມານແຫ່ງລັດ ປະຈໍາປີ 2024;  ກອງປະຊຸມຄັ້ງນີ້ ຈະໄດ້ນໍາສະເໜີບາງເນື້ອໃນເອກະສານສໍາຄັນ, ເຊິ່ງຕ້ອງໄດ້ພ້ອມກັນຄົ້ນຄວ້າ, ຕີລາຄາ, ປະກອບຄໍາຄິດເຫັນ ແລະ ເຊື່ອມຊືມ ບັນດາບັນຫາທີ່ສໍາຄັນຕົ້ນຕໍ ດັ່ງນີ້: ບົດສະຫຼຸບການຈັດຕັ້ງປະຕິບັດວຽກງານຂະແໜງຄັງເງິນ ປະຈໍາປີ 2024 ແລະ ທິດທາງ ແຜນການ ປີ 2025; ສະຫຼຸບແຜນພັດທະນາຂະແໜງຄັງເງິນ 4 ປີ ແຕ່ປີ 2021-2024 ແລະ ທິດທາງ ປີ 2025 ທີ່ຕິດພັນກັບວາລະແຫ່ງຊາດ; ຕີລາຄາການຈັດຕັ້ງປະຕິບັດວຽກງານຫັນເປັນທັນສະໄໝ ( ລະບົບ LIFMIS ), ວຽກງານລວມສູນບັນຊີ TSA ໃນ 06 ເດືອນທ້າຍປີ 2024 ແລະ ທິດທາງຈັດຕັ້ງປະຕິບັດ ປີ 2025; ຮັບຟັງການສະເໜີ ການພັດທະນາ ລະບົບ LIFMIS ຈາກບໍລິສັດຜູ້ພັດທະນາ ພ້ອມກັນນັ້ນກໍ່ໄດ້ຮັບຟັງການ ເຜີຍແຜ່ ຂໍ້ຕົກລົງ ວ່າດ່ວຍລະບຽບການຄຸ້ມຄອງ ພະນັກງານ-ລັດຖະກອນ ຂະແໜງຄັງເງິນ ສະບັບເລກທີ 0082/ກງ.

          ທ່ານ ຍັງໃຫ້ຮູ້ຕື່ມວ່າ: ໃນປີ 2025 ຈະມານີ້ ຂະແໜງການເງິນ ຂອງພວກເຮົາ ຈະໄດ້ຮັບໜ້າທີ່ການເມືອງ ອັນໜັກໜ່ວງ, ມີແຜນການຈັດເກັບລາຍຮັບທັງໝົດ 68,100 ຕື້ກີບ, ປະມານ18.16% ຂອງ GDP, ໃນນັ້ນ ລາຍຮັບພາຍໃນ 62,700 ຕື້ກີບ, ລາຍຮັບຊ່ວຍເຫລືອລ້າ 5,400 ຕື້ກີບ. ສໍາລັບດ້ານລາຍຈ່າຍທັງໝົດ 71,850 ຕື້ກີບ ປະມານ 19.16% ຂອງ GDP ແລະ ການຂາດດຸນງົບປະມານ ຈໍານວນ 3,750 ຕື້ກີບ ປະມານ 1% ຂອງ GDP; ເຊີ່ງເຫັນວ່າເປັນຕົວເລກການຈັດເກັບລາຍຮັບທີ່ສູງພໍສົມຄວນ ທີ່ຂະແໜງການເງິນຂອງພວກເຮົາ ຕ້ອງບຸກທະລຸ ຕ້ານການຮົ່ວໄຫລ ທາງດ້ານຮັບ ແລະ ລາຍຈ່າຍ; ຈັດເກັບລາຍຮັບໃຫ້ຄົບຖ້ວນ ໃຫ້ໄດ້ຕາມແຜນ ຫຼື ລື່ນແຜນ ເພື່ອໃຫ້ພຽງພໍກັບລາຍຈ່າຍ, ຊໍາລະໜີ້ສິນ ມີສ່ວນສະສົມ; ພ້ອມນັ້ນລາຍຈ່າຍ ກໍຕ້ອງເຂັ້ມງວດຈໍາກັດ ຈ່າຍໃຫ້ຖືກຕ້ອງຕາມຕົວຈິງ ຖືກກັບລະບຽບກົດໝາຍ. ເຊິ່ງການບຸທະລຸວຽກງານດັ່ງກ່າວໄດ້ ມັນຮຽກຮ້ອງໃຫ້ພວກເຮົາ ຕ້ອງມີຄວາມສາມັກຄີພາຍໃນອັນໜັກແໜ້ນ ພ້ອມກັນຈັດຕັ້ງປະຕິບັດໜ້າທີ່ການເມືອງ ແລະ ຂະແໜງການເງິນພວກເຮົາ ຍົກສູງຄວາມເປັນເຈົ້າການ, ເປັນແບບຢ່າງທີ່ດີໃຫ້ຂະແໜງ ການອື່ນ, ເອົາໃຈໃສ່ຈັດຕັ້ງປະຕິບັດ ແລະ ຜັນຂະຫຍາຍ ທິດຊີ້ນຳຂອງກົມການເມືອງສູນກາງພັກ ໂດຍສະເພາະເນື້ອໃນຂອງມະຕິ ຂອງກົມການເມືອງສູນກາງພັກ ວ່າດ້ວຍການສ້າງເສດຖະກິດ ເອກະ ລາດ ເປັນເຈົ້າຕົນເອງ ໃນໄລຍະໃໝ່ ສະບັບເລກທີ 04/ກມສພ, ລົງວັນທີ 11 ເມສາ 2024. ແຕ່ນີ້ຮອດປີ 2026 ຕ້ອງສຸມທຸກກໍາລັງແຮງສັງລວມ ເພື່ອຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XI ຂອງພັກ ໄລຍະທ້າຍສະໄໝ ໃຫ້ປະກົດຜົນເປັນຈິງ ດ້ວຍຄຸນນະພາບ ແລະ ປະສິດທິຜົນຕົວຈິງ ຕາມຈິດໃຈສ້າງການຫັນປ່ຽນໃໝ່ທີ່ແຂງແຮງ, ເລິກເຊິ່ງ ແລະ ຮອບດ້ານ.

          ໂດຍກອງປະຊຸມໄດ້ພ້ອມກັນ ຄົ້ນຄວ້າຕີລາຄາລົງເລິກ, ວິເຄາະ-ວິໄຈ ແລະ ປະກອບຄໍາເຫັນແລກປ່ຽນຢ່າງມີຈຸດສຸມໃນການແລກປ່ຽນຄຳຄິດເຫັນກັນ ແລະ ກັນ ຕາມຄຳຖາມເຈາະຈີ້ມຂອງກອງປະຊຸມ ຢ່າງມີວິທະຍາສາດ, ຫຼາກຫຼາຍ, ກົງໄປກົງມາ ແລະ ສ່ອງແສງສະພາບຕົວຈິງ, ເປັນເຈົ້າການແກ້ໄຂບັນດາບັນຫາທີ່ຄົງຄ້າງໃຫ້ຫຼຸດລົງ ແລະ ກ້າວໄປສູ່ການແກ້ໄຂ ສຳເລັດຂາດຕົວ.